آخد إيه معايا وأنا رايحة المصيف؟

مع إننا نعتبر في آخر الصيف وتقريبًا كل الناس خلاص صيّفت ورجعت، لكن في ناس بتحب تستنى تروح تصيّف في الروقان. لو أنتي لسه مروحتيش تصيّفي وهتروحي اليومين دول، دي شوية اقتراحات هتسهل عليكي وأنتي بتجهزي حاجتك علشان المصيف.

1) المايوه 

سواء كنتي محجبة أو غير محجبة، لازم يكون معاكي في المصيف مايوه علشان تنزلي البحر أو حمام السباحة أو الاتنين. اختاري نوع المايوه اللي يتناسب مع شكل جسمك ومتنسيش تختاري لون مناسب. للناس المليانة: الألوان الغامقة بتظهر الجسم أرفع شوية؛ الألوان الفاتحة بتظهر الجسم أتخن شوية.

مايوه  مريح للمحجبات

مايوه قطعة واحدة من أكسسورايز

2) فستان ماكسي / جامبسوت jumpsuit 

أنا في رأيي إن الفستان والجامبسوت هما أحسن قطعتين ملابس على الإطلاق لأنك مش بتحتاجي تعمل تنسيقات كتير عليهم، هما كده في حد ذاتهم طقم. الفستان أو الجامبسوت بتكون حلوة جدًا على البحر لو مش ناوية تنزلي المية أو هتكتفي بالجلوس على الشاطئ، وأنصحك تختاري فستان أو جامبسوت تكون قماشته قطن أو كتان أو أي قماش خفيف ومريح علشان متزهقيش، واختاري نقشات مرحة وألوان زاهية.

جامبسوت بنقشة أوراق الشجر الاستوائية، مريحة وأنيقة ومناسبة للمصيف

فستان بنقشة الزهور، رقيق ومريح ومناسب للمصيف

3) بنطلونات أو شورتات أو جيب قماش منقوشة 

خدي معاكي بنطلون أو اتنين أو جيبة أو اتنين أو مكس من ده وده (ولو أنتي مش محجبة ممكن تاخدي شورتات برضه). ابعدي خالص عن الجينز لأن في المصيف بيكون الجو رطوبة وجلدنا بيكون ملتهب من طول التعرض للشمس، والجينز بيكون تقيل شوية. كمان ابعدي عن الليجن legging أو أي لبس ضيق لنفس السبب. اختاري حاجات واسعة بنقشات ظريفة وألوان مبهجة علشان تحسي بروح المصيف وكمان علشان تعرفي تركبي عجل وتلعبي براحتك. واختاري معاهم بلوزتين تلاتة باللون الأبيض و/أو البيج أو أي لون محايد وسادة يليق عليهم، وتكون قماشتهم برضه خفيفة ومريحة.

إطلالة شبابية مريحة من إتش آند إم

تنسيق أنيق لبنطلون منقوش على قميص جينز

الألوان المحايدة والأقمشة المريحة لطلة بسيطة ومريحة

كده نكون خلصنا اللبس الأساسي، ندخل بقى على الإكسسوارات.

4) طاقية قش straw hat 

طبعًا مفيش مصيف من غير طاقية قش. غير إن شكلها بيكون "كول" في الصور، هي بتوفر لك حماية من الشمس وأنتي على الشاطئ. زمان كانت الطاقية القش بتنزل باللون البيج الطبيعي المميز للقش، لكن دلوقتي في منها ألوان كتير وأشكال كتير. أنا بحب جدًا تصميمات إتش آند إم وأكسسورايز لأنها بتكون رقيقة وخامتها كويسة وأسعارها معقولة، خصوصًا في التخفيضات.

طاقية للشاطئ أنيقة وهتليق على أي حاجة من أكسسورايز

5) نضارة شمس 

متنسيش تاخدي معاكي نضارة شمس، بس أنا أنصحك إنك لو عندك نضارة شمس من ماركة غالية متاخديهاش معاكي على الشاطئ علشان ميجرالهاش حاجة، وخدي معاكي أحسن نضارة عادية من ستارديفاريس أو ألدو علشان لو اتكسرت أو ضاعت أو باظت من المية أو جرالها أي حاجة متزعليش. ومن جهة تانية، هتقدري تواكبي الموضة وتجيبي أحدث صيحة في النضارات الشمس.

نضارة شمس شبابية أنيقة من ستارديفاريس 

نضارة شمس من ألدو أنيقة وسعرها معقول

6) شنطة للبحر/ شنطة كروس أو شنطة ضهر backbag 

الشنط القش طالعين موضة بقالهم كام سنة ومبقوش مقتصرين على المصيف بس، لكن أنا بقصد الشنط القش اللي بتكون مناسبة للشاطئ من حيث إنها بتكون ملائمة لألوان الطبيعة، وهتليق على أي حاجة تلبسيها، وبتاخد كل حاجة أنتي هتحتاجيها وأنتي رايحة الشاطئ، وفوق كل ده بتكون أسعارها معقولة ومش غالية قوي.

لو أنتي حابة إن الشنطة القش تكون للشاطئ بس، هاتي معاكي شنطة كروس أو شنطة ضهر صغيرة backbag، الغرض من الشنطة الكروس أو شنطة الضهر إنك متكونيش مضطرة تمسكيها في إيدك، وبالتالي هتعرفي تتحركي براحتك وتتسوقي وتركبي عجل وتلعبي، وفي نفس الوقت تلمي فيها حاجتك بدل شنطة البحر اللي غالبًا بتكون كبيرة وبتتمسك في الإيد.

شنطة مناسبة للمصيف من أكسسورايز

شنطة ضهر من أكسسورايز

شنطة كروس من أكسسورايز

7) شبشب flip-flop 

"الصيف يأتيكم برعاية الشبشب اللي بصابع"، لكن الحقيقة هو ممتاز بالذات في المصيف علشان بيكون مفتوح، وبالتالي مش هيخلي رجلك جرادل رمل، وبيكون عملي لو اتبل من المية، ومريح وسهل في لبسه وموجود في كل حتة أشكال وألوان وأسعاره رخيصة. أنصحك تاخدي معاكي واحد احتياطي علشان لو اللي أنتي لبساه اتقطع، يكون معاكي بديل.

شبشب أنيق للمصيف من أكسسورايز

8) جزم/صنادل مريحة 

وأنتي رايحة المصيف خدي معاكي جزمة أوصندل مريح علشان تعرفي تستمتعي بالأجازة، أنصحك تاخدي صندل واحد يكون لونه بيج وهتلاقيه لايق على كل حاجة وأي حاجة وهيريحك قوي في المشي واللعب والجري والسواقة لو أنتي اللي هتسوقي. لو مش بتحبي الصنادل، خدي باليرينا أو كوتشي خفيف أو جزمة بدون كعب. الشباشب كمان طالعة موضة قوي بقالها كذا سنة، ومبقتش مقتصرة على الستات الكبيرة، ممكن برضه تاخدي معاكي شبشب slippers بدل الصندل أو الجزمة.

شبشب شبابي مريح وخفيف مناسب للمصيف من ألدو وفي حاجات شبهه في ديجا فو

شبشب كلاسيكي وعصري مريح ومزين بالصدف اللي طالع موضة جدا السنة دي من أكسسورايز

بالرينا كلاسيكية أنيقة ومريحة من ألدو

9) شال خفيف 

هو صحيح إحنا في الصيف والجو حر ورطوبة، بس في المصايف والبلاد اللي بتطل على السواحل، الجو بيبرد بالليل، خصوصًا لو هتروحي تصيفي في آخر أغسطس أو في سبتمبر. خدي معاكي شال خفيف احتياطي علشان لو الجو برّد أو لو حسيتي ببرد بالليل من طول التعرض للهواء بعد الخروج من البحر أثناء النهار، وأنا شخصيًا دايمًا أحس ببرد بالليل في المصيف.

شال خفيف بألوان زاهية مناسب للمصيف من أكسسورايز

10) كريم واقي من الشمس Sun block 

ده أهم شيء تاخديه معاكي في المصيف علشان تحمي بشرتك من أضرار الشمس خصوصًا إننا بنقعد طول النهار على البحر. خلي بالك إن الكريم الواقي من الشمس مش بيحميكي من الاسمرار، لكن هو بيمنع آثار الأشعة فوق البنفسجية لأنها ضارة جدًا للبشرة، وتقدري تقولي إن الكريم الواقي من الشمس بيوفر حماية بسيطة من الاسمرار لكن الأهم إنه بيحمي بشرتك من الالتهابات وحروق الشمس. أنصحك تجيبي كريم واقي من الشمس بعامل حماية 50 (SPF 50). ادهني كل الأماكن في جلدك اللي هتتعرض للشمس، ومتنسيش تحطي من الكريم ده كل ساعتين. وفي منه بخاخ بيكون سريع في وضعه لكن أغلى شوية.

مجموعة منتجات واقية للشمس من ماركات مختلفة، كلهم رائعين بس غاليين شوية

دي كل حاجة هتحتاجيها معاكي في المصيف بالإضافة للحاجات بتاعة الاستخدام اليومي اللي بتتاخد معانا في كل حتة زي فرشاة الأسنان والمعجون وغسول وكريمات البشرة وفوط وبيجاما. لو في حاجة تانية بتاخديها معاكي المصيف، شاركينا في التعليقات.

ملحوظة: الصور أرشيفية