حكاية البراندات (1)

أولا وقبل أي شيء، براند (Brand) يعني ماركة أو علامة أو شعار أو صورة أو تصميم أو أي حاجة بتميز مؤسسة أو شركة أو منتج، سواء كان المنتج ده رخيص أو غالي، مشهور أو غير مشهور، جودته حلوة أو رديئة. من فترة كانت كلمة براندات انتشرت بمعني "منتج فاخر، غالي، عالي الجودة، إلخ ..."، وبقت المنتجات بتتسوق من منطلق إنها براند يعني حاجة كويسة، وده مش حقيقي، لأن مجرد ما المنتج ما بقى له اسم متسجل أو معروف بيه، هو كده بقى براند، بغض النظر بقى عن جودته. 

أنا هتكلم هنا عن البراندات المتعلقة بالموضة والتجميل لأن دي الحاجات اللي بحبها. 

أولا: البراندات في الموضة 

البراندات في الموضة بتتقسم لتلات أنواع:

1- البراندات الفاخرة (High end/luxury) زي ديور وشانيل وجوتشي ودولشي إيه جابانا وكرستيان لوبوتان ولوي فيتون وفندي وميو ميو وفالانتينو. البراندات دي بتبقى غالية جدا وسعر القطعة الواحدة فيها بتبقى بآلاف الدولارات. مثلا التي شيرت من لوي فيتون سعره 400 دولار، الشنطة من شانيل متوسط سعرها 6 آلاف دولار، وفي ماركة إرميز (Hermès) الفرنسية العريقة، ودي سعر الشنطة فيها بيبدأ من 10 آلاف دولار، وأصلا مينفعش تدخلي البوتيك وتشتري واحدة وتمشي، لازم تعملي تاريخ مع المحل الأول وتشتري عدد من المنتجات، ولو محظوظة في يوم من الأيام هتقدري تشتري منهم شنطة (الكلام ده بالنسبة لشنطة بيركن وشنطة كيلي، أشهر وأغلى شنطتين بتنتجهم الدار)! الجزمة من لوبوتان متوسط سعرها 700 دولار. إيه اللي بيخلي الماركات دي غالية بالشكل ده؟ من الأسباب اللي بتخلي الماركات دي غالية إنها بتستخدم خامات فائقة الجودة وغالبا بتكون مصنوعة يدويا، ده غير التصميم اللي بيكون مبتكر وعدد القطع مبيبقاش كتير، يُضاف لكل ده إن الماركات دي قديمة بقالها عشرات السنين ومؤسسيها أصبحوا أيقونات في عالم الموضة واتعمل عنهم أفلام (زي كوكو شانيل)، وقوة التسويق عندهم بتخلي في إقبال شديد عليهم خصوصا إن عدد كبير من نجوم الفن والأثرياء والمشاهير من حول العالم عملاء عندهم، وده بيخلي منتجاتهم عليها طلب شديد حتى مع ارتفاع أسعارها.

حذاء سو كيت الشهير من كريستيان لوبوتان سعره 725 دولار 

شنطة بيركن من دار إرميز العريقة سعرها 11,900 دولار

حذاء فالانتينو روكستد الشهير سعره 775 دولار

شنطة شانيل كلاسيك فلاب متوسطة الحجم سعرها 5,600 دولار

2- تاني نوع هو البراندات الممتازة (Premium) زي تيد بيكر ومايكل كورس وكلوب موناكو وكارن ميلن وكوتش وتوري بورش. الماركات دي بتمسك العصاية من النص: بتقدم منتجات فائقة الجودة وبتصميمات فيها روح الاتجاهات السائدة في الموضة لكن بدون ما تقلد، وفي نفس الوقت بتكون أسعارها أرخص كتير من الماركات الفاخرة، لكن برضه غالية. مثلا الفستان من تيد بيكر متوسط سعره 400 دولار، التوب من تيد بيكر سعره حوالي 150 دولار، السويتر من كلوب موناكو متوسط سعره 200 دولار الشنط من توري بورش متوسط سعرها 350 دولار، الشنط من مايكل كورس متوسط سعرها 500 دولار.

جاكت من كارن ميلن بسعر 1,199 دولار

فستان من تيد بيكر بسعر 439 دولار

شنطة من مايكل كورس بسعر 550 دولار

3- تالت نوع هو البراندات الجيدة (High street) زي زارا ومانجو وفيرو موضة وبول آند بير وبيرشكا وستراديفاريس وماركس آند سبنسر وألدو وتشارلز آند كيث. الماركات دي هي أكثر ماركات منتشرة في العالم، ومالك مجموعة شركات إنديتكس جروب (مالكة محلات زارا وبيرشكا وستارديفاريس وبول آند بير وعدد آخر من المحلات والماركات) هو أمانسيو أورتيجا (ملياردير أسباني) وده كان تاني أغنى رجل في العالم وحاليا هو سادس أغنى رجل في العالم، ده ممكن يديكم فكرة عن مستوى مبيعات المحلات دي. الماركات دي بتتميز بأنها بتكون جودتها كويسة إلى حد كبير، وبتكون دايما مواكبة للموضة وده لأنها بتستوحي تصميماتها من كبرى دور الأزياء. بالإضافة للجودة الكويسة والتصميمات الحديثة والكلاسيكية، الماركات دي بتصنّع منتجاتها في بلدان بتتميز برخص العمالة زي الصين والهند وبنجلاديش، فده بيساهم في إنها تبيع بسعر يعتبر "عالميا" مش غالي.

البراندات بقى زي إتش آند إم وإل سي واكيكي ورد تاج، فدي بتعتبر في منزلة أقل شوية من تالت نوع من البراندات، وده لأن خامات منتجاتها بتكون أقل جودة، وده بيخليها أرخص "عالميا".

أنا مذكرتش براندات مصرية هنا، لكن الحقيقة في براندات مصرية جميلة جدا ومنتجاتها حلوة جدا زي كونكريت وموباكو كوتونز وروجادا وغيرهم بس دول اللي في بالي دلوقتي.

وبكده تكون كلمة "براندات" في حد ذاتها مش ضمانة إن المنتج يكون كويس، لأن في براندات بتكون رديئة الجودة. 

وأخيرا، عايزة أقول لكم إن مش لازم نشتري من الماركات دي ولا من الأماكن دي علشان نكون شيك ومميزين، المهم إننا نختار اللبس اللي يناسبنا ويليق علينا (ومش مهم جايبينه منين ولا بكام) ونكون واثقين في نفسنا ومننساش الابتسامة الجميلة ... هو ده بس اللي بيخلينا حلوين ومميزين.

وإن شاء الله أكمل لكم حكاية البراندات في المكياج في بوست تاني.

ملحوظة: جميع الصور في هذه المقالة أرشيفية.