حكاية البراندات (2)

اتكلمنا في المقال السابق عن معنى كلمة براند، وعن أنواع البراندات في الموضة. لو عايزة تقري الجزء الأول من حكاية البراندات، اضغطي هنا.

في المقال ده هنتكلم عن البراندات في المكياج 

ثانيا: البراندات في المكياج

البراندات في المكياج بتتقسم لنوعين اتنين:

1- البراندات الفاخرة (High end/luxury makeup) زي نارس (NARS) وتارت (tarte) وهدى بيوتي وتوم فورد وديور وشانيل ولورا ميرسييه (Laura Mercier) وإربن ديكاي (Urban Decay) وماك (MAC) وميكب فورإفر ولانكوم وجيفانشي وغيرهم وغيرهم. متوسط أسعار البراندات دي كالآتي: كريم الأساس من نارس سعره 50 دولار، كريم الأساس من هدى بيوتي 40 دولار، كريم الأساس من ماك 30 دولار، بودرة لورا ميرسييه 38 دولار، بودرة ماك 30 دولار، ظل جفون من هدى بيوتي 65 دولار، روج من هدى بيوتي 25 دولار، روج من ديور 37 دولار، روج من توم فورد 60 دولار، هايلايتر أمريزي من أنستازيا بيفيرلي هيلز 30 دولار. إيه اللي بيخلي المكياج ده غالي بالشكل ده؟ أول حاجة التسويق. البراندات دي بتعمل تسويق قوي جدا، وبتستعين بالمشاهير ومدونات الموضة والمكياج علشان يروجوا لمنتجاتهم. تاني حاجة، الجودة. البراندات دي بتستخدم منتجات فائقة الجودة وأصباغ قوية وأحيانًا بيكون عندهم تكنولوجيا حصرية تخلي منتجهم يعتني بالبشرة بالإضافة لخواصه التجميلية الأساسية (تعتبر ماركة كلارينز Clarins من أفضل الماركات اللي بتنتج مكياج بيعتني بالبشرة). المكياج من الأنواع دي بيكون سهل في تطبيقه وبيمتزج مع البشرة بسرعة وسهولة، وبيكون متوفر بدرجات مختلفة بتوصل في بعض البراندات لأربعين درجة لون مختلفة، وده معناه إنك هتلاقي درجة تلائم لون بشرتك بالظبط ولما تحطي المكياج هيبان طبيعي ومثالي، وكمان بيقعد مدة طويلة على الوش كأنك لسه حطاه (مع مراعاة نوع كل بشرة)، وفي أنواع بتظهر في التصوير كأنك مش حاطة مكياج أصلاً (مكياج إتش دي HD) ومش بيعكس الضوء في التصوير، وبالنسبة لظل الجفون بيطلع اللون في الفرشاة بنفس التقل والكثافة من أول مرة ومش بتضطري تحطي كذا طبقة وبرضه بيمتزج على الجفون بسهولة وبيقعد طول اليوم بدون ما يبهت، ونفس الشيء ينطبق على الروج والهايلايتر وباقي منتجات المكياج من الماركات دي. بالإضافة لجودة المنتج نفسه، تغليف المنتجات من البراندات دي بيكون فاخر وشكله أنيق جدا.

الروج من توم فورد

هايلايتر أمريزي من أنستازيا بيفرلي هيلز

باليتة "نود" الجديدة من هدى بيوتي

كريم أساس نارس

2- تاني نوع هو البراندات العادية (drugstore makeup) وأشهرهم لوريال ومبيلين. المكياج من الماركات دي بيكون كويس جدا، لكنه أقل جودة من المكياج الفاخر. ومتوسط أسعاره بيكون كالآتي: متوسط سعر كريم الأساس 12 إلى 15 دولار، الماسكارا حوالي 10 دولار، ظل الجفون حوالي 15 إلى 20 دولار، الروج حوالي 10 دولار. طبعا بمقارنة الأسعار هنلاقي فرق كبير جدا. منتجات البراندات دي بتحتاج وقت أطول وأنتي بتحطيها على ما تمتزج بالبشرة، وألوان ظلال الجفون مش بتكون قوية وبتبهت بعد كام ساعة، لكن الروج بتاعهم بيكون كويس جدا. تغليف المنتجات دي بيكون مقبول وكويس، لكنه مش فاخر وأنيق، وبيكون كله تقريبًا من البلاستيك علشان يقدروا يبيعوا بسعر معقول، ده غير إنه بيتوفر بدرجات محدودة سواء في كريم الأساس أو ظلال الجفون أو حتى الروج. البراندات دي متوفرة في كل بلدان العالم وبيحققوا مبيعات رهيبة، وعلشان تاخدي فكرة عن مستوى مبيعات البراندات دي، ليليان بيتنكور (وريثة العائلة اللي أسست شركة لوريال) مليارديرة وواحدة من أغنى النساء في العالم (توفت مؤخرًا).

روج لوريال

علبة ظل جفون من ميبيلين

في الحقيقة أنا معرفش أي براندات مصرية في المكياج غير أماندا وأنا كنت بجيب منها زمان وكانت منتجاتها كويسة ومُرضية بالنسبة لي.

أخيرًا، أنا مش بهتم كتير بالبراندات وبحب أشتري اللي يعجبني، لكن في المكياج بالذات أنصحكم تشتروا ماركات موثوقة (مش لازم تكون غالية) من أماكن موثوقة. وحقيقي حتى المكياج العادي بيكون غالي خصوصًا لو لسه في الجامعة أو ملكيش مصدر دخل، لكن اعتبريه استثمار علشان تحافظي على بشرتك وعيونك. بلاش نشتري الماركات المجهولة أو الرخيصة بزيادة لأنها ممكن تدمر بشرتنا وتعمل لنا مشاكل جلدية.