اكتشفت لكم: كنز من المانيكير

أنا بقالي فترة غير راضية عن المانيكير اللي عندي، وأنا الحقيقة عندي تشكيلة كبيرة من أوريفليم وكام إزازة كده من ديور وجيرلان. وأنا من البنات اللي ممكن تخرج بدون مكياج وعاملة شعري كعكة ولابسة أي بنطلون جينز على بلوفر أو تيشيرت، بس مش ممكن أبدا أقدر أخرج ولا حتى أقعد من غير مانيكير. فأنا بستهلكه كتير وبيخلص بسرعة، وتقريبا جربت كل الأنواع: من الرخيص للغالي. 

ما أقدرش أقول إن مانيكير ديور (Dior) أو جيرلان (Guerlain) وحش. هما مش وحشين خالص، بس مش مميزين إطلاقا ... عاديين جدا، يمكن ديور فيه ميزة هي إنه بينشف بسرعة. جيرلان عادي جدا، هي الأزايز شكلها جميل وخامتها كويسة والفرش كمان حلوة، بس المانيكير نفسه عادي. أما أوريفليم (Oriflame)، فهو متواضع، وبضطر أحط طبقتين علشان يديني اللون اللي أنا عايزاه، وكمان بيقعد كتير جدا جدا على ما بينشف، ده بالإضافة لإنه غالي على جودته المتواضعة. في كمان يولو (Yolo)، بس أنا محبتهوش خالص ... بحسه ميّة ولكن هو بينشف بسرعة برضه. 

ولأن الماركات العالية زي ديور وجيرلان بتكون غالية، فأنا مش بجيب منهم غير الألوان اللي بستخدمها كتير زي الأحمر والنبيتي والنود (nude). 

إمبارح بقى وأنا في سيتي ستارز، عديت على ستاند مانيكير اسمه رنواي (Runway)، فقلت هجيب إزازة أجربها يمكن يطلع كويس. أنا وقفت أجيب إزازة لقيت نفسي بحاسب على 9 أزايز؛ إزاي وإمتى وفين وليه، معرفش! حقيقي كان عاجبني جدا ومسكت نفسي بالعافية علشان أنا عايزة أجربه الأول. ووقت لما رُوحت كان ممكن الآنسة اللي موجودة تحط لك مانيكير لو حبيتي. 

أول ما رَوَّحت شيلت مانيكيري وجربت الألوان لأني مكنتش جربتها هناك على إيدي. كانت حاجة واو! حقيقي رائع! مميزاته كالآتي: 

1) تقيل. من أول مرة بتحطي بيطلع معاكي نفس اللون مش لون بهتان، فكده أنتي مش هتضطري تحطي طبقتين. وفي نفس الوقت مش تقيل بحيث إنه يعمل كُتَل. 

2) الفرشة بتاعة المانيكير حلوة جدا وبتخليكي تحطي في الضافر بسهولة بدون ما تبهدلي حوالين الضافر، وحتى الفرشة لما بتطلع مش بتبقى شايلة كمية كبيرة من المنتج، يعني بيسَّهِل جدا إنك تحطي لنفسك المانيكير. 

3) المانيكير بينشف بسرعة جدا. 

4) شكل الأزايز معقول. 

5) حجم الإزازة معقول جدا على سعرها. 

6) سعره حلو جدا بالمقارنة بخامة المانيكير (الإزازة سعرها 45 جنيه مصري). 

7) عندهم نوع اسمه (Runway Breathe) ده بيسمح بتخلل الهواء والميّة علشان لما تتوضي ميبقاش في حُرمانية. 

8) عندهم مجموعة ضخمة جدا من الألوان ما بين المطفي واللامع واللي فيه جليتر، مفيش لون مش عندهم. 

9) المنتج والشركة مصرية. 

10) اللون لوحده بدون طبقة أساس ولا طبقة شفافة فوقه بيقعد حوالي 3 أيام بدون ما يقشر (مع الأخذ في الاعتبار إني مش بحط إيدي في الماية كتير ولا بعمل شغل بيت كتير). بالطبقة الأساسية (base coat) والطبقة الشفافة (top coat) بيقعد حوالي عشر أيام بدون ما يقشر ولا حوافه تبهت. 

أنا عايزة أكون موضوعية وأقوله عيوبه برضه، لكن أنا الحقيقة لسه منبهرة بيه، فمش قادرة أطلع عيوب، يمكن اللي ضايقني حاجة واحدة بس: إنه الدفع بيبقى كاش، معندهمش دفع إلكتروني سواء كارت ائتمان أو خصم مباشر. 

مجموعة المنتجات اللي اشتريتها.

صورة مجمعة للمنتجات اللي اشتريتها 

صورة أوضح للمنتجات

لون روز جولد